Lottóleikir » Gæsahúð fyrir allan peninginn!

Til baka í listaGæsahúð fyrir allan peninginn!
Lottó-fréttir

Konan sem átti annan vinningsmiðanna síðasta laugardagskvöld hélt fyrir andlitið þegar hún kom á skrifstofu Íslenskrar getspár, svo mikið var sjokkið yfir að þetta skyldi allt standast. Hún er einstæð móðir þriggja barna og 75% öryrki eftir slys. Þær búa mjög þröngt svo þeirra fyrsta verk verður að kaupa húsnæði, bíl og jafnvel einhver húsgögn. Miðann keypti hún í Ísgrilli við Bústaðaveg. Hún hálf hrasaði inn í sjoppuna því hún sá ekki þrep niður og afgreiðslukonan sagði: „Er ekki fall fararheill?!“ og útbjó miðann fyrir hana, en það eru fjórar raðir með sömu tölunum sem hún hefur haft í 13 ár. 


Í samtali við fulltrúa frá Íslenskri getspá sagðist hún hafa keypt þennan aukamiða á Bústaðaveginum því hún mundi ekki hvort tveggja vikna miðinn, sem hún hafði keypt áður, væri enn í gildi en þann miða keypti hún í Olís við Norðlingabraut, og hann var auk þess týndur.



Við þessar fregnir runnu tvær grímur á starfsfólk Getspár og eftir rannsóknarvinnu kom í ljós að sama konan átti báða miðana, en annar týndur! Nú voru góð ráð dýr. Hún var á heimleið til að snúa öllu við þegar hún spurði afa sinn heitinn hvar miðinn væri. Og það stóð ekki á svari. Hún lagði bílnum og kíkti undir sætið þar sem miðinn beið.



Í seinna skiptið sem hún kom á skrifstofurnar í Laugardalnum, þá skalf hún, titraði og þurfti að hafa sig alla við að skrifa nafnið sitt. Þegar hún hafði jafnað sig sagði hún okkur frá góðum draumi um að hún ætti húsnæði skuldlaust og í draumnum var hún að sýna dóttur sinni pappírana um að þær ættu húsnæðið. Draumurinn verður að veruleika, ótrúlegir hlutir gerast, og í stað rúmlega 42 milljóna fær hún tæpar skattfrjálsar 84,5 milljónir, þökk sé miðanum sem kom í leitirnar.



Starfsfólk Íslenskrar getspár óskar vinningshafanum innilega til hamingju og þakkar landsmönnum öllum fyrir frábæra þátttöku og framlag þeirra til verðugra málefna.