Lottóleikir » Vinningsmiðinn með rúmlega 104 milljónir kominn í leitirnar

Til baka í listaVinningsmiðinn með rúmlega 104 milljónir kominn í leitirnar
Lottó-fréttir

Hjón á Selfossi höfðu heldur betur heppnina með sér eftir að hafa keypt sér lottómiða í Krambúðinni á Selfossi, miðinn góði færði hjónunum vinning upp á rúmar 104 milljónir. Lottópotturinn var hæsti sexfaldi vinningur hingað til og fór hann óskiptur á einn miða.

Maðurinn hafði séð í fjölmiðlum að vinningshafinn frá öðrum degi jóla væri enn ekki búinn að gefa sig fram og hafði hann orð á því við konu sína að það væri nú óskandi að þessi stóri vinningur færi á góðan stað. Aldrei grunaði hann að konan sín lumaði á miðanum góða í veskinu sínu.

Hjónin voru ekki almennilega búin að ná áttum með þessar gleðifréttir og má segja að þau hafi enn verið hálf skjálfandi þegar þau komu með vinningsmiðann á skrifstofu Íslenskrar getspár. Með í för var barnabarn þeirra hjóna og sögðu þau að það fyrsta sem þau ætluðu að gera væri að fara með snáðann í búð þar sem hann mætti velja sér eitthvað fallegt, ekki stóð á svarinu hjá snáðanum; “eitthvað Liverpool tengt” sagði hann alsæll. Aðrar ráðstafanir á vinningnum voru þau ekki enn farin að huga að.

“Það geta greinilega allir dottið í lukkupottinn” sagði vinningshafinn að lokum er þau kvöddu höfuðstöðvar Íslenskrar getspár í Laugardalnum, brosandi út að eyrum, enda allt í einu rúmum 104 milljón krónum ríkari.

Ein milljón bíður eftir að vera sótt úr Milljólaleiknum.
Sama dag var einnig dregið úr Milljólaleiknum og biðjum við alla þá sem höfðu keypt sér 10 raða miða hjá Jolla í Hafnarfirði í Lottó, Vikinglotto eða EuroJackpot í desember að skoða vel jólaleiksmiðann sem fylgdi með, því á númerinu 10036260 leynist vinningur upp á eina milljón.

Starfsfólk Getspár/Getrauna óskar vinningshafanum innilega til hamingju og þakkar um leið veittan stuðning sem skiptir gríðarlega miklu máli fyrir íþrótta- og ungmennafélögin í landinu sem og öryrkja sem njóta góðs af sölu Lottós.