Húskerfið hjá Víkingum fékk 13 rétta og skilaði tæplega 2.8 milljónum króna í vinninga. Þetta er í annað sinn á stuttum tíma sem húskerfið gefur 13 rétta, en í desember fengu Víkingar 4.6 milljónir í vinning. Getraunastarfið hjá Víkingum hefur verið afar öflugt og ljóst að það skilar líka vinningum til baka.  

Glúrinn tippari vann um 4,5 milljónir króna á Sunnudagsseðlinum þegar hann fékk 13 rétta, einn Íslendinga. Tipparinn notaði sparnaðarkerfið S 7-2-486 sem er nokkuð sterkt kerfi. Sett eru þrjú merki á sjö leiki og tvö merki á tvo leiki og eitt merki á fjóra leiki. Gangi kerfið upp eru 5,5% líkur á 13 réttum.

Það kom nöskum tippara heldur betur á óvart þegar starfsmaður Getrauna hringdi í hann á mánudagsmorgun og óskaði innilega til hamingju með vinning upp á 8.3 skattfrjálsar milljónir. Tipparinn hafði ekki hugmynd um vinninginn, hann hafði fylgst aðeins með seðlinum á laugardeginum og sýndist hann stefna í 11 rétta en mörk á lokamínútum í leikjum hjá Stoke og Leeds tryggðu honum 13 rétta. Tipparinn styður KR og tippar reglulega með misjöfnum árangri en vildi meina að stundum væri gott að vera klunni.

Það voru þrír tipparar sem voru með 13 rétta á Miðvikudagsseðlinum á Íslandi. Fá þeir hver í sinn hlut tæpar 700.000 krónur. Vinningsupphæðin fyrir 10 rétta náði ekki lágmarksupphæð og flyst því yfir á 13 rétta á sunnudagsseðlinum og má búast við að risapotturinn verði nálægt 45 milljónum króna fyrir 13 rétta.

Vegna þess að Svíþjóð spilar við England um brons á laugardaginn kl. 15:00 voru tveir leikir í sænsku úrvalsdeildinni færðir fram um klukkustund. Við það detta þeir út af seðlinum og verður kastað upp á úrslit þeirra.
Leikirnir sem um ræðir eru númer 2 Kalmar FF-AIK og leikur númer 3 Sirius-Östersund.

Það var glúrinn tippari sem var með alla leikina rétta á Enska getraunaseðlinum á laugardaginn. Tipparinn tvítryggði átta leiki og setti eitt merki við fimm leiki. Alls notaði hann því 256 raðir sem kostuðu 3.328 krónur.  Heildarvinningar sem tipparinn fær í sinn hlut eru rúmlega 9,5 milljónir króna. Tipparinn keypti miðann í Fjarðarkaupum í Hafnarfirði. 

Um helgina verða borgarslagir af bestu gerð í ensku úrvalsdeildinni. Á laugardag mætast Tottenham – Arsenal. Þessi félög hafa marga hildi háð og eru í baráttu um sæti í Meistaradeild Evrópu. Á sunnudag mætast svo Everton – Liverpool. Rígurinn hefur verið mikill milli liðanna og ljóst að leikmönnum og áhangendum Everton þætti ekki leiðinlegt að leggja stein í götu Liverpool í átt að fyrsta Englandsmeistaratitlinum í 29 ár.

Glúrinn tippari var með alla leikina þrettán rétta á Sunnudagsseðlinum í getraunum og fékk hann tæpar 2.4 milljónir í vinning. Tipparinn tippaði á sparnaðarkerfi þar sem hann var með 7 þrítryggða leiki og 6 leiki með einu merki. Kerfið heitir S 7-0-36 og kostar 468 krónur. Það þarf því ekki að tippa á stórt kerfi til að vinna góða vinninga í getraunum. Tipparinn styður Íþróttafélag fatlaðra í Reykjavík. Íslenskar getraunir óska tipparanum til hamingju með vinninginn og landsmönnum öllum gleðilegs árs og farsældar á nýju ári. 

Það var risastór pottur í Getraunum í dag eða rúmlegar 330 milljónir króna í vinning fyrir 13 rétta. Þrír getspakir Svíar skiptu á milli sín pottinum og fær hver um sig rúmlega 110 milljónir íslenskra króna. Þrír Íslendingar voru ekki langt frá stóra vinningnum en giskuðu á 12 leiki rétta og fá þeir um 450 þúsund krónur í vinning, þessir þrír Íslendingar styðja Víking Reykjavík, ÍR og Íþróttafélag Fatlaðra í Reykjavík.

Það er nóg um að vera í boltanum um jól og áramót.  Að sjálfsögðu bjóðum við upp á getraunaseðla eins og venjulega og eru stórir pottar í boði.

Jóla- og áramótaseðlarnir:
22. desember kl. 14:00 Enski boltinn
190 milljóna risapottur

23. desember kl. 12:30 Sunnudagsseðill
80 milljóna risapottur