Kona á sextugsaldri var ein með allar tölurnar réttar um síðustu helgi og fékk fyrir vikið óskiptan fimmfaldan lottópott upp á rúmar 78 milljónir króna sem er einn stærsti lottóvinningur síðustu vikna.
Í samtali við starfsfólk Íslenskrar getspár kom í ljós áhugaverð saga á bak við valið á vinningstölunum. Konan, sem er bæði mamma og amma, hafði misst náin ástvin ekki alls fyrir löngu og var að vitja leiðisins í kirkjugarðinum. Þar tekur hún símann fyrir rælni og fer í lottóappið og velur sjálf talnaröðina sem byggði á tengslum við hinn látna og hugsaði mikið og hlýtt til viðkomandi um leið.
Viti menn, hún var ein með allar tölurnar réttar. Það kom sérfræðingum Íslenskrar getspár raunar smá á óvart að vinningurinn skyldi ganga út því talnarunan á laugardaginn virtist við fyrstu sýn harla ólíkleg til að skila fyrsta vinningi vegna sérkennilegrar dreifingar á tölunum; en þær voru 1, 25, 27, 35 og 36. Það voru því kærkomin gleðitár sem féllu þegar konan, fékk símtalið góða frá Íslenskri getspá í byrjun vikunnar og markar vonandi komu fleiri gleðistunda hjá fjölskyldunni eftir erfiða tíma að undanförnu.
Við óskum vinningshafanum innilega til hamingju og þökkum um leið veittan stuðning sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu þar sem þau njóta góðs af allri sölu Lottó.
