Hann þurfti aðeins að hafa fyrir hlutunum rúmlega sjötugi maðurinn sem var einn með allar tölur réttar í Lottó um síðustu helgi. Hann keypti vinningsmiðann á N1 við Borgartún en lét athuga á öðrum sölustað, nokkrum dögum seinna, hvort vinningur leyndist á miðanum. Þegar Lottókassinn sendi frá sér vinnings-fagnaðarlætin sem alla spilara dreymir um að heyra tjáði afgreiðslumaðurinn þeim heppna að því miður væri ekki hægt að greiða út vinninginn á staðnum heldur þyrfti hann að gera sér sérstaka ferð í höfuðstöðvar Íslenskrar getspár.
Þótti manninum tíma sínum illa varið í slíka viðbótarsnúninga, kominn á besta aldur en lét þó til leiðast og lagði á sig þetta aukaferðalag í Laugardalinn. Þar var honum boðið upp á kaffi og þaulreyndur gjaldkeri kallaður til svo hægt væri að segja þeim heppna góðu fréttirnar með hæfilegri mýkt. Allar áhyggjur voru þó óþarfar því sá heppni tók fréttunum um vinning upp á rúmlega 21 milljón með stökustu ró, enda traustur Lottóspilari til áratuga. Klykkti hann loks út með orðunum „Ég hef alltaf sagt þetta, þú færð ekki neitt ef þú ert ekki með“.
Við óskum vinningshafanum innilega til hamingju og þökkum um leið veittan stuðning sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu þar sem þau njóta góðs af allri sölu Lottó.
