„Ég er bara ennþá ekki að trúa þessu!“, segir ung móðir með tvö smábörn.
Heppnin var svo sannarlega með lítilli fjölskyldu í fæðingarorlofi um síðustu helgi þegar óskiptur fyrsti vinningur í Lottó fell í þeirra hlut, rúmlega átta og hálfar skattfrjálsar milljónir króna. Fjölskyldan er nýflutt á höfuðborgarsvæðið og festi kaup á eigin húsnæði ekki alls fyrir löngu og því var þakklætið algjörlega ósvikið. „Ég er bara ennþá ekki að trúa þessu,“ sagði eigandi vinningsmiðans og bætti við að tímasetningin gæti varla verið betri núna í orlofinu.
Hún segir að vinningurinn muni auðvelda þeim að standsetja nýju íbúðina eftir eigin höfði og láta draumana um frekara nám mögulega rætast og kannski komast í langþráð frí. Sú heppna sagðist alltaf spila með 10 raðir í appinu en að þessu sinni hefði hún bætt við aukamiða með fimm röðum. Hún fékk tilkynningu í appinu um þrjá rétta á aðalmiðanum en þegar hún rýndi í aukamiðann kom stóri vinningurinn í ljós!
Starfsfólk Getspár/Getrauna óskar fjölskyldunni innilega til hamingju og þakkar um leið veittan stuðning sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu þar sem þau njóta góðs af allri sölu Lottó.
