Stærsti sexfaldi pottur sögunnar gaf vel af sér um þarsíðustu helgi en alls voru um 18 þúsund manns sem fengu vinning, þar af voru sjö með bónusvinninginn og 15 voru með annan vinning í Jóker. Tveir ofurheppnir spilarar voru svo með allar tölurnar réttar og hlaut hvor um 57 milljónir í sinn hlut.
Annan miðann áttu hjón sem standa á miklum tímamótum en auk þess að vera við starfslok höfðu þau nýverið selt húsnæðið sitt til að komast í búsetu sem hentar betur þeirra þörfum. Vegna óvæntra útgjalda, á borð við uppgreiðslukostnað lána, var eftirtekjan allnokkru minni en þau höfðu gert ráð fyrir. Það voru því sterkar tilfinningar sem gerðu vart við sig þegar ljóst var að stóri vinningurinn hefði breytt þessari jöfnu til batnaðar um 57 milljónir og enn meiri tilhlökkunar til efri áranna.
Hinn vinningshafinn ætlar bara að sækja sínar 57 milljónir seinna
Hinn heppni miðaeigandinn, sem er áskrifandi og býr á landsbyggðinni, tók fréttunum af öllu meiri ró og sagðist einfaldlega ætla að koma og sækja vinninginn næst þegar hann ætti eitthvað erindi í höfuðborgina.
Við óskum vinningshöfunum innilega til hamingju og þökkum um leið veittan stuðning sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu þar sem þau njóta góðs af allri sölu Lottó.
